येडगाव : येडगावच्या खानेवाडी परिसरामध्ये दहशत निर्माण करणाऱ्या बिबट्याला पकडण्यात वनविभागाला यश आले असल्याची माहिती वनक्षेत्रपाल लहू ठोकळ यांनी दिली. पकडलेला बिबट्या सुमारे सहा वर्षाचा नर असून त्याला माणिकडोह येथील निवारा केंद्रात हलवण्यात आला आहे. सोमवारी (दि. २) रात्री साडेअकरा वाजण्याचे सुमारास हा बिबट्या पिंजऱ्यात अडकला.
येडगावच्या खानेवाडी या ठिकाणी गेल्या काही दिवसांपासून या बिबट्याची मोठी दहशत होती. मागील आठवड्यामध्ये एका बारा वर्षाच्या मुलाचा या बिबट्याच्या हल्ल्यातून बचाव झाला. केवळ नशीब बलवत तर म्हणून हा मुलगा वाचला. मागील आठवड्यात सायंकाळी सात वाजण्याच्या सुमारास हा मुलगा आपल्या घराकडे जात असताना पिकप गाडीच्या खाली दबा धरून बसलेल्या बिबट्या मुलाच्या अंगावर झेप घेण्याच्या तयारीत होता.
बिबट्याची झेप मुलावरची चुकली आणि बाजूला असलेल्या कुत्र्यावर पडली. बिबट्याने कुत्र्याला उसाच्या शेतात फरपटत नेऊन ठार केले. शरद नेहरकर यांचे हे पाळीव जर्मन शेफर्ड कुत्रे होते. त्यावेळी बिबट्याच्या हल्ल्यातून बचावलेल्या मुलाने बाजूच्या घराची कडी वाजून घरात प्रवेश मिळवला म्हणून तो वाचला.
दरम्यान या परिसरामध्ये या बिबट्याने अनेकांच्या कोंबड्या तसेच पाळीव कुत्री फस्त केली होती. स्थानिक नागरिकांच्या तक्रारीवरून वनविभागाने शरद नेहरकर यांच्या घराच्या बाजूला असलेल्या उसाच्या कडेला चार दिवसापूर्वी पिंजरा लावला होता. बिबट्याला खाद्य म्हणून कोंबडी ठेवण्यात आली होती. दोन दिवस हा बिबट्या पिंजऱ्याच्या आजूबाजूला येऊन जायचा, परंतु पिंजऱ्यामध्ये येत नव्हता.
स्थानिक नागरिकांनी वनविभागाला बिबट्याला भक्ष म्हणून बकरी ठेवण्याची सूचना केल्यानंतर वनविभागाने बकरी ठेवल्याने सोमवारी (दि. २) रात्री साडेअकरा वाजता हा बिबट्या पिंजऱ्यात अडकला. या बिबट्याला वन विभागाने माणिकडोह येथील निवारा केंद्रामध्ये हलवण्यात आले असल्याचे वनक्षेत्रपाल लहू ठोकळ यांनी सांगितले.
असा अडकला बिबट्या पिंजऱ्यात
सोमवारी (दि. २) रात्री ११ वाजण्याच्या सुमारास योगेश नेरकर हा युवक कामावरून घरी येत असताना त्याला खाणेवाडी येथे डांबरी रस्त्यावर बिबट्या दिसला. त्याने ही माहिती शरद नेहरकर यांना दिली. शरद नेहरकर यांनीही तातडीने आजूबाजूच्या लोकांना फोन करून बिबट्या आल्याची खबर दिली, तसेच योगेश नेहरकर यांना घरी नेण्यासाठी चार चाकी गाडी पाठवून त्याला घरी नेले. त्यानंतर हा बिबट्या शरद नेहरकर यांच्या घराजवळ आला. बाजूच्या पिंजऱ्यात असलेल्या बिबट्यांवर हल्ला करण्याचाही प्रयत्न केला.
परंतु पिंजरा भक्कम असल्यामुळे बिबट्याला काही करता आले नाही. नंतर बिबट्याने आपला मोर्चा उसाच्या कडेला लावलेल्या पिंजऱ्याकडे वळवला. बिबट्याला भक्ष म्हणून बकरी ठेवण्यात आले होती. या बकरीच्या शिकारीच्या आशेने बिबट्या पिंजऱ्यात गेला आणि अडकला. पिंजऱ्याचा मोठा आवाज झाल्यावर शरद नेहरकर यांनी तात्काळ वन विभागाला ही माहिती दिली. वनविभागाची रेस्क्यू टीम घटनास्थळी येऊन त्यांनी बिबट्याला माणिकडोह येथील निवारा केंद्रात हलवले.
