सिंगापूर: भारताचा डी. गुकेश बुद्धिबळाचा नवा विश्वविजेता ठरला. विश्वनाथन आनंद नंतर जागतिक बुद्धिबळ स्पर्धेचे विजेतेपद मिळवणारा गुकेश हा दुसरा भारतीय ठरला आहे. १८ वर्षीय गुकेशने चीनच्या डिंग लिरेनचा पराभव करून विश्वविजेतेपद मिळवले.जागतिक बुद्धिबळ अजिंक्यपद लढतीत १३व्या डावापर्यंत दोघांचे ६.५ इतके गुण झाले होते. आज अखेरची १४वी आणि निर्णायक लढत होती. या लढतीत डिंग पांढऱ्या मोहऱ्यांनी खेळला. चौदा डावानंतर सर्वप्रथम ज्या खेळाडूचे ७.५ गुण होतील ते विजेता ठरणार होता. या अखेरच्या लढतीत बाजी मारत गुकेशने इतिहास घडवला.
गुकेशच्या आधी २०१३ साली भारताच्या विश्वनाथन आनंदने जागतिक बुद्धिबळ विजेतेपद मिळवले होते. त्यानंतर ११ वर्षांनी देशाला हा मान पुन्हा मिळाला आहे. डिंग लिरेन हा या स्पर्धेतील गतविजेता होता. १४व्या लढतीच्या आधी झालेल्या १३ डावांपैकी पहिला डाव ३२ वर्षीय डिंग लिरेनने जिंकला होता. त्यानंतर गुकेशने तिसरा डाव जिंकून बरोबरी साधली होती. त्यानंतर दोन्ही ग्रँडमास्टर्समधील सलग ७ डाव बरोबरीत सुटले होते. अखेर ११व्या डावात विजय मिळून गुकेशने आघाडी घेतली. तेव्हा गुकेशने ६-५ अशी आघाडी मिळवली होती. मात्र डिंगने १२व्या डावात बाजी मारली आणि पुन्हा एकदा बरोबरी झाली. १३वा डाव बरोबरीच सुटल्याने आजचा डाव निर्णयक होता. आज देखील बरोबरी झाली असती तर जलद टायब्रेकरने विजेता ठरवला गेला असता.
अशी होती विजयानंतरची गुकेशची प्रतिक्रिया
चेन्नईचा गुकेश डी हा बुद्धिबळ इतिहासातील तिसरा सर्वात लहान ग्रँडमास्टर आहे. तो २०१९ साली ग्रँडमास्टर झाला होता. बुद्धिबळात २७०० गुणांचे रेटिंग पूर्ण करणारा तो तिसरा सर्वात लहान खेळाडू आहे. १६ ऑक्टोबर २०२२ रोजी गुकेशने तत्कालीन जगज्जेता मॅग्रस कार्लसनचा पराभव केला होता.
Author: rayatdarpan
news
